كعادتهم انصار التقعير , يقفزون علينا بتحليلاتهم الفذة ..... و لكن هناك رؤي اخري لتفسير حاله التحرش الجنسي في التحرير ...
ع المحطة
ع المحطة
و اللي شفته ع المحطة
***
طلعت الخفة ام شنطة
سلم الاتوبيس
بنطة
حته ملعب
و الاكادة
في القوام و الحسن
بطة
***
هي خشت درجه اولي
و الكراسي بقت منطة
سابوا تانية
و غلب تانية
و القطيع علي اولي خطى
اللي يهبش في الجونلة
و اللي يعلى
و اللي يوطى
***
بص واحد م اللي هما
دمهم فلفل و شطة
شاف صنايعي
في البريمو
قال له خش هناك يا اسطى
تانية انسب للي زيك
دي الحقيقة بلاش مغالطة
لاسطى قال ياعم روق
دي الحياة تحب المباسطة
و انت شايف
مش مغمض
حاجة ملبن
حاجة قشطة
و لا يعني الكون ح يخرب
لو فقير
يلهط له لهطة
أحمد فؤاد نجم
طبعا تحسبا ان محدش يتعولق عليا , انا مقصدش ان البنات هما اللي غلطانين و التفسير الغبي اياه ده للموضوع انما الموضوع زي ماقال زياد الرحباني بمنتهي العبقرية الجوع كافر
2 comments:
و لا يعني الكون ح يخرب
لو فقير
يلهط له لهطة
مش حتكلم في الموضوع كتير بس الكلام البسيط ده عميق جدا في معناه ومعبر
مش عارفه الموضوع ماشي يخوف انو بقى تحرش جماعي بس من زمان قوي واحنا بنخاف نمشي في الشارع وكل الناس بتعلق يعني انا بالنسبه ليا بحب امشي جدا بس مضطرة اني اسوق العربية واروح مشويري حتى لو كانت جنب البيت
الموضوع كبير ومن زمان كبير واوقات بقول كويس انو الموضوع كبر زي ما حصل في وسط البلد عشان الناس تفكر شويه
تخيل لو الزمن تقلب والبنات بقو يعملو كده مافيش حاجه مستحيله عشان احنا في زمن العجايب
انا بنت وبدايق قوي من الموضوع ده اوقات بمشي وكاني ما سمعتش حاجه بمشي بسرعة ودا في حالة التحرش اللفظي لان التحرش مش فعل بس
واوقات بيبقى الموضوع لا يطاق فبتكلم حتى اوقفه عند حده
بس الغريبة اني في اوقات كتير بضحك لما اشوف عيل صغير بيعاكس بحس اد ايه احنا عايشين في جهل..
لما يشوفه اي وحده في الشارع يقومو معرينها بنظراتهم وده في السابق
الحمد الله انهم انتقلو لمرحلة متقدمة
دا مرض وخلاص تفشى للاسف في كل المجتمعات العربية مش عارفه ازاي حيلاقولو علاج!!
طولت عليك بس بلوج جميل وكلمات معبرة وصور رائعة
رشا
الموضوع فعلا مقلق و بيحصل من زمان افتكر كمان انه في بلد في محافظة الشرقية من حوالي 10 سنين كان بيحصل اكتر من ده بمراحل يعني مثلا كان الولاد يجوا ورا بنت و بسرعة يشدوا الجيب او البنطلون و يسيبوها و يجروا و هي في الشارع منتهي الاهانه لكائن جميل شفاف زي المرأة و منتهي الانتهاك بخصوصية الجسدالموضوع فعلا بقي محتاج تغيير لنظام اجتماعي اكثر عداله دة من الكبت تصوري راجل عنده 35 سنه ولسة متجوزش من ناحية و من التانية الخوف الديني محاصرة و ميقدرش يعيش علاقة لأنها - من وجهه نظرة زنا _ الفقر وحش الحاجه بنت كلب
____________________
رضوى
متحزنيش ولاد البلد لسه موجودين و كمان زي ماهما الشاب منهم يكون شارب كمية بنجو غريبة و عليهم شوية برشام محترمين و حاجات تخليه ماشي عايز ينام مع اي واحدة ولو شاف واحدة بنت حتته بتتعاكس هيتخانق مع اللي بيضايقها ولو دخل و لقي اختة نايمة عريانه هيغطيها وموضوع اخته مش حاجة بديهيه في العالم دلوقتي ما يسموه بزنا المحارم انتشر جدا و علي فكرة ممكن يكون النوع ده نفسة بيمارس تحرش لفظي بالفتيات بس بردة الجوع كافر انا اتمني نرجع زي زمان و كمان انا مختلف مع موضوع الحجاب و مع التحرر الكامل من كل القيود اللي علي كل الناس بس الموضوع اكبر من حلم شخصي
Post a Comment